البؤساء

البؤساء.......مجموعة وجوة كنت رسمتها لموضوع بيتكلم عن الفقر

توتي فروتي

توتتي فروتي ...... ههههههههههههه اه اصلي مالقتلوش اسم غير دة

شوفوها وقولولي اية رأيكوا

حلمي ... حلمك

أحمد حلمي ... من الممثليين الجامديين قوي واللي قدروا في وقت قصير يثبتوا موهبتهم وانهم عفاريت تمثيل

بس انا سمعت مقارنة من اتنين عن حلمي ومحمد سعد بما انهم طلعوا في نفس الوقت . طلعوا دي يعني ظهروا في نفس الوقت

اقروها عشان ما طولش عليكوا

س : شفت فيلم حلمي الجديد

ص: يالهوووي دا يا بني فيلم فاجر

س : شفت أخر ربع ساعة في الفيلم كانت عاملة أزاي

ص : يابني دا البهريز كله كان في أخر ربع ساعة دي

س: بهريز ايه يا عم الحج انا بكلمك علي الفيلم مش بكلمك علي مسمط حبايب السيدة

ص: بس حلمي بتعجبني طريقة تفكيرة قوي شوف مع انه ظهر مع محمد سعد انما قدر يعمل انجاز كبير

س: انا معاك مع ان الاثنين ظهروا مع بعض في وقت بس تحس ان سعد بيكرر نفسه في كل فيلم يعني من اول اللمبي لكركر يا قلبي لا تحزن

ص: صح انما حلمي با حس انه بيتعب عقبال ما بيلاقي فكرايه جامدة يعملها فيلم

س : انا بحس ان محمد سعد ما بيمثلش غير كاركترات وبيعتمد في ادائها علي نبرة الصوت والنيو بوك بتاع كل شخصية

ص: نيو بوك . انت شفت الفيلم في كتاب سلاح التلميذ ولا ايه ؟ ههههههههههه

س : انما حلمي فتحس انه بمثل شخصية بيلعب دور مش بيلعب علي المهارات في التقليد وبس

ص: معاك حق ربنا يكرم الاثنين والاثنين بصراحة فنانين والناس كلها بتحبهم جدا

دة الحوار اللي سمعته من اتنين شباب تعليقا علي فيلم كدة رضا . يارب يعجبكوا

اه. نسييت اقولكوا ان احمد حلمي بيعمل فيلم واحد في السنة وانه خد في فيلمه الاخير يا اما تلاته مليون او اكتر فا اعتقد دلوقتي حلمي قاعد بيعد الفلوس وبيقول كدة رضا اوي اوي اوي

الهضبة عمرو دياب

هما سموه الهضبة ليه ما عرفش ؟

بس اللي أقدر أقوله انا الراجل سوسة جدا يعني تشوفة ما تديلوش أكتر من حاجة وتلاتين سنة

تسمع الاغاني بتاعته تسرح معاه اقولكوا علي حاجة انا اول ما الشريط الجديد بتاعه نزل انا ماكنتش حابه

وقلت هو بيعيد نفسه ليه في كل شريط بس بعد ما سمعته اكتر من مرة حبيت اغانيه جدا . انا يمكن اختلف بس معاه انه كتير بيقلد انريكي

اجلسيس ولسه ضارب الغلاف بتاعه البومه الاخير منه . ايوه بتاع الليليه دي

وان عمرو مصطفي نازل نحت من الاغاني الاجنبي بس مش مشكلة الهضبة هيفضل طول عمره هضبة مع اني مش عارف اساسا يعني ايه هضبة

عصيدة شعر

أضغط علي الصورة للتكبير

الشعر اللي انتوا شايفينه قدامكوا إهداء من صديقي فنان الكاريكاتير والشاعر ابراهيم مرزوق

اقروها و قولولي ايه رايكوا

أشرف حمدي

دة صديقي الفنان أشرف حمدي

رسمته كدة مش عارف هتعجبة ولا لا

بس عموما اهو اترسم يعني اتدبس في الرسمة

هههههههههههههههههههههه

قولي لي اية رايكوا

أنا بيد الفنان ياسر حسين

دة بورترية رسمه لي اخي الكبير وصديقي الفنان ياسر حسين في ساعة تجلي حسب التوقيت المحلي ...... ههههههههههههه

ركزوا فيه كويس وما تحكموش عليه من اول مرة وابقوا قولوا لي رايكوا اية

اّخر قرصان

دة بورترية لصديقي احمد ابو القاسم وشهرتة اّخر قرصان هتلاقي مدونة اسمها فسحاية اخر قرصان هتلاقوها في اللينكات بتاعة البلوجرات المفضلة عندي

نصيحه لله محدش يدخل عندة البلوجر لحسن يقرصن عليه ولا حاجة ولقد اعذر من انذر

عايز اعرف ايه رايكوا في الرسمة

لارس 2

انا مانزلتش البوست ده حبا في نني عينة انا نزلت البوست دة
عشان الرسومات في البوس اللي قبل دة ما كنتش بتكبر فافضلت اني انزل الرسومات في بوست منفصل

عشان تقدروا تشوفوا الرسم بطريقة افضل وتشوفوا قد ايه الراجل ده

قفل ومفيش عندة عقل من اساسه

ملحوظة : انا بس عندي تعليق صغير علي الرسمة الاولي المفروض اني ما اشرحش الرسمة بتقول اية ولا بتتكلم

عن ايه لان دة مخالف لفن الكاريكاتير ودة لانها لغة عالمية ممكن اي حد يفهمها بمجرد النظرللرسمة . التعليق عبارة ان لارس بيرسم برباط جزمة كائن هو التعصب والجهل ودي الترجمة الحرفية للكلمتين الانجليزي اللي علي الرسمة

من يريد أن ينشر رسمي هذا على مدونته فلا مانع لدي ومن يريد أن يطبعه في جريدته أو مجلته فلا مانع أيضا

لارس فيلكس

مستغربين طبعا من الخلقه العجيبة دي .... ده رسام اسمه لارس فيلكس سويدي الجنسية والراجل ارتكب جريمة في حق المسلمين كلهم

وهو انه رسم الرسول عليه الصلاه والسلام علي جسم كلب ( أستغفر الله العظيم ) . دي مثال من الرسوم المسيئة

وبما اني رسام وعربي ومسلم انفعلت ورسمت ردا علي الرسوم دي اللي أكتر تعليق ممكن يتقال عنها انها نبش فراخ زي ما قال الفنان ياسر حسين والفنان اشرف حمدي وانا اضم صوتي لصوتهم . يعني لا فنان و متعصب علي الفاضي وجاهل بالأسلام

يعني مش فاهم اي حاجة ...يبقي ماينفعش اسكت ولازم ارد عليه بمبدأ العين بالعين والسن بالسن والكاريكاتير بالكاريكاتير

ده نقدي للراجل ده واللي حبيت أظهر فيه ان التعصب للغرب والجهل هما الريشة الاساسية اللي بيرسم بيها شغله اساسا ده لو كان بيعرف يرسم

وان مخه مخ حيوان ركز في الصورة وانت هتعرف اسم الحيوان دة

ودة ان دل عن شي دل علي انه لا فنان ولا حاجة مجرد واحد عايز

يتشهر ويسب ويلعن في الاسلام والنبي عليه الصلاة والسلام وكا دة تحت مسمي حرية التعبير

تاج أبو صلاح

طبعا انتوا شايفين التدبيسة الاصلي اللي دبسني فيها ابو صلاح بس هاعمل اية هجاوب وامري لله


لوقالو لك أختار عصر من عصور مصر علشان تعيش فيه تختار اي عصر وفي اي عهد واي حاكم واشمعني ؟

انا اختار اعيش في عصر المماليك والدولة العثمانية والجو دة وبالذات في عهد محمد علي باشا شخصيا واقولك لية محمد علي بالذات اصلي بحب دماغ الراجل دة ازاي الراجل دة من لاشي و جندي في الجيش الالباني يمسك حكم مصر ويعمل فيها كل النهضة دي ملحوظة اللي مستغرب كلامي يراجع الفصل التاسع في كتاب التاريخ بتاع ادبي في ثانوية عامة الراجل دة عمل نهضة علمية وثقافية واول واحد يعمل مطابع في مصر شغلانة يعني وكان نفسي اكون موجود ساعة الاغتيال اللي عمله للمماليك و احذرهم ان الراجل دة يهودي ومدبر لكوا مقلب وهيموتكوا بس ما كنش حد منهم هيسمع كلامي يلا مش مشكلة ..

اول اولوية في حياتك عيلتك ولا شغلك ولا اصحابك ؟

بصراحة عيلتي هي اهم اولوية ليا واول اولوية في حياتي وبعد كدة الصحاب وفي الاخر الشغل


اية اكتر حاجة بتحبها في رمضان ؟

اكتر حاجة بحبه في رمضان الجو اللي بيبقي بعد الفطار تلاقي الناس كلها طيبة وتبص في وشهم تحس بأرتياح غريب والصلاة في الجامع وقراءة القران بالليل اول ما بحس اني مخنوق او في موضوع تاية فيه ومش عارف اقف علي ارض صلبة بحب اتوضي واصلي واقعد ادعي واقرا قران وجو اللمه اللي بيبقي بعد الفطار والعزومات ولمة العيلة وقعدة القهوة مع الاصحاب بالليل لو اقعد احكي مش هاخلص خليني اجاوب علي السؤال اللي بعدة

أوصف ليا أجمل فطار ممكن تفطرة ؟

أحلي فطار ممكن افطرة ... اقولك اولا طبق الخشاف الجامد او البلح باللبن ادخل بقي علي الفطار مكرونة بالباشميل وطبق الطرشي الجامد اللي مليان فلفل حراق مليان شطة وجنبها طبق كفتة كدة وحبة تحابيش واللهي جوعتني اللهم اني صايم المهم ندخل في الحلو القطايف المحشية مكسرات اللي عايمة في السكر او طبق زلابية او لقمة القاضي غرقانة في العسل لا ياعم كفاية كدة هافطر وها تبقي انت السبب

لو انت حاكم مجموعة من الأفراد هتكون عادل ؟ طب هتعمل اية عشان تتأكد انك حاكم عادل ؟

والله مش عارف بس ممكن اقولك اني بطبع شخصيتي اني مش ديكتاتور يعني هكون عادل في الحكم عليهم
اما ازاي اقدر اعرف اني عادل اقولك انا فعلا لو عادل هتلاقي الناس دي بتتعامل معايا بأرتياح وانا عارف انك ممكن تقول ممكن يعاملوك كدة خوف منك او احترام بس اقولك مش شكر في نفسي بس انا بقدر افهم اللي قدامي كويس واقدر اعرف انه بيعمل علي فيلم وبكدب ولا بيتكلم بصدق


اللي يبوظ الحكام . نفسهم ولا الشعب ولا الحاشية المقربة ؟

التلاته مع بعض

مين أكتر أعلامي مصري بتحبة ؟

عماد الدين أديب

قريت ديوان عمر مصطفي بتاع بلوج تجربة ( اسباب وجية للفرح ) عن دار ملامح ولا لسة ولو اة اية رأيك فيه؟

لا ماقريتهوش

لو ممكن تشتغل شغلانة تانية غير اللي أنت بتشتغلها أو كنت بتشتغلها كنت تتمني تبقي أيه ؟

كنت هتمني برضة أشتغل رسام كاريكاتير وصحفي لأني اساسا منفعش في اي شغلانة الا دول

اية تاني بلد تتمني تعيش فيها بعد مصر ؟

أسبانيا او باريس ودة لاني بحبهم اقوي اسبانيا احلي بلد ممكن تشوفها معالم سياحية وتراث حاجة وهم كدة باريس بقي يعني مدينة النور متحف اللوفر بلد الفنون الجميلة كلها بجد نفسي اسافر اسبانيا او باريس

أوصف ليا ترتيبات أجمل فرح ممكن تحضرة ؟

انا مبحبش الافراح التقليدية بحب الافكار الجديدة يعني انا قريت قريب في جرنال اسمه الجمعة ان في واحد عمل فرحة كله علي البسين واخر الفرح راح ناطط هو والعروسة في المية والمعازيم وراهم والحياة كلها كانت بلل في بلل ممكن تقول اية المجنون دة بس انا قولتلك ما بحبش الافكار التقليدي

بتراعي كلام الناس والقيل والقال . ولا لا وقول اه ولا لا لية ؟

لا لا لا ودة لان كلام الناس لا بيقدم ولا بيأخر يعني الناس كلها لما تمسك موضوع وتقعد ترغي فيه وبعد فترة يدوروا علي موضوع تاني يرغوا فيه وهكذا ... عرفت لية انه لابيقدم ولابيأخر

صحيت من النوم مالقتيش الموبايل ولا الكمبيوتر وال الكاميرا الديجيتال و لقيتنا رجعنا لعصر الحمام الزاجل هتكون سعيد ؟

دة لو حصل كدة ممكن أموت ماينفعش أكون من غير الموبايل واقعد ارن واتكلم وابعت مسدجات والكمبيوتر مش ممكن اعيش من غيرة ولا من غير النت والافلام الاجنبي والاغاني وشاكيرا و فيروز والفوتو شوب والكاميرا الديجيتال مقدرش اعيش من غيرها دة شغلي كلة بخلصه بيها لا يا عم مقدرش اعيش من غيرهم

السعادة هي ؟

راحة البال وان تكون من جواك حاسس بنفسك قوي وسعيد بنجاحك والاول طبعا قبل كل دة رضا الله عليك

لما تحب تهرب من كل شي بتروح فين ؟

بحب اتمشي في وسط البلد وبعد كدة اطلع علي كوبري قص النيل وقعد افضل ماشي من التحرير لحد ما اوصل
للجيزة

أمتي أول مرة خدت فيها نفس طويل كدة وقلت بينك وبين نفسك يااااه الظاهر أنا فعلا كبرت ؟

اول ما تميت ال 20 سنة وحسيت ان دي أخر سنة ليا في الجامعة وبعدها هاتخرج وابدا ادور علي شغل واتحمل مسؤلية نفسي

لما بتعمل عمل خيري بيكون ايه هو دافعك الاول ؟

بيكون دافعي الاول اني بحب الناس كلها ومدام في استطاعتي اقدم الخير دة فلية لا

بتشرب سجاير . ولو الاجابة أة . اية شعورك لو شفت ست بتشرب سجاير . ولية ؟

كنت بشرب سجاير والحمد لله ربنا انعم عليا وبطلت وبصراحة لوشفت ست بتشرب سجاير هستحقرها جدا
بتعرف أيدك اليمين من الشمال أزاي ؟

اه والله دي مشكلة فعلا بس ممكن اقولك اني علطول بلبس الساعة في ايدي الشمال فلو غلط مرة ولبستها في ايدي
اليمين هتلخبط ومش هعرف ايدي اليمين من الشمال

أية اكتر موسيقي بتحبها . واية اكتر اله موسيقية بتحبها ؟

أكتر موسيقي بحبها موسيقة الرحبانية او الاخوان رحباني وطبعا دة بصوت جارة القمر الجميلة فيروز اما الموسيقة الاجنبي فا انا بحب الموسيقة الاتيني والاسباني والبوب اوي اوي . اما اكتر اله موسيقية بحبها
هي الجيتار الاسباني بعشقة جدا

في رأيك لية الذوق والنخوة أتعدموا ؟

هما موجودين لغاية دلوقتي بس أحنا اللي اتغيرنا وبقينا وحشين أوي في بعض وبقينا ماديين وكله بيجري ورا الفلوس عشان كدة أتعدموا

أية الحاجة اللي لو حصلت لك تبقي سعيد قوي ؟

ابقي سعيد قوي لو حققت احلامي اللي طول عمري بحلم بيها واني اقدر اتحدي نفي واكون الانسان اللي انا رسمة في مخيلتي من زمان

تختار يبقي عندك أرض زراعية ولا احدث عربيات ولا كام عمارة ولا فلوس في البنك ؟

لا انا اختار يكون عندي ارض زراعية لاني بيها ممكن اجيب العربية وابني عمارة ويبقي ليا رصيد في البنك

البحر ولا النيل ؟

النيل طبعا

مركب ولا طيارة ؟

الطيارة

مجنون ولا عاقل ؟

مجنون جدا جدا جدا

تقرأكتاب ولا تتفرج علي فيلم ؟

أتفرج علي فيلم بس يبقي أحلي وأحلي لو أقرا رواية واتحولت بعد كدة لفيلم زي عمارة يعقوبيان ونادي القتال

بتممر التاج لمين ؟

امرره لمين .... امرره ل د . اشرف حمدي و الفنان ياسر حسين وياسمين حميد و سمسم
وحبة حاجات البلوجر بتاع إيمان

هالة سرحان الجزء الثاني

عودة هالة ......لا دة مش فيلم رعب ولا حاجة بس ممكن تقول ان دة تكملة فيلم عربي اتعمل علينا

وللاسف كلنا صدقناه ....ها افتكرت ان كنت ناسي افكرك

انتظروا اجرأ حوار علي الشاشات العربية حوار فتيات الليل الدنيا قامت وقعدت وازاي

البنات دي تتكلم بالطريقة دي وطلع كل دة كان فيلم وانتوا طبعا عارفين الباقي

سفر حالة سرحان للندن للعلاج وصور في الجرايد والمجلات

ليها وهي علي سرير المرض عشان نصدق وبرضة طلع في الأخر فيلم

روتانا تتخلي عن حالة سرحان في محنتها الأخيرة ومانشيتات

تأكد الخبر وتفأجا انها ي رمضان دة بتظهر في برنامج يومي علي روتانا موسيقي والله اعلم سمعت برضة انها بتعمب برنامج علي

قناة ال ال بي سي الفضائية اللبنانية

عرفت لية بقولك ان كل الموضوع دة فيلم وانت بتتفرج علية بدون ماتحس

لحظات رمضان

اولا كل رمضان وانتوا بخير ...... انا اخترت عنوان لحظات رمضان عشان حاجة مهمة قوي

وهي ان الشهر الكريم دة بيعدي في لحظات يبدأ وبعد كدة تلاقي اول عشر ايام في الشهر خلصوا هوب جه نص الشهر هوب لاقيت نفسك في العشرة الاواخر وبتختم القرأن عشان كدة بقولك بيعدي في لحظات

عشان كدة انا سجلت لحظتين في رمضان يارب يعجبوكوا

اللحظة الاولي : بنت بتستعد لشهر رمضان بتكتب جدول يومي ليها هتقرا كام جزء في اليوم

هتصلي قيام الليل والتراويح بمعني اصح واخده الموضوع جد وناوية

تستفيد بالشهر الكريم دة بكل طاقتها

اللحظة التانية : بنوتة اهم حاجة عندها هتقضيها ازاي في رمضان اية المسلسلات

الجديدة اللي هتتعرض

وقصة كل مسلسل اية بالضبط واية حكم الدين في ان البنت ممكن تكلم المز بتاعها او خطيبها في نهار رمضان وهل يجوز ولا لا وهل ممكن تكلمة بالليل ولو طول تستأذنة وتقولة اصلي هاصلي قيام الليل جماعة هنا مع العيلة متعطلنيش اكتر من كدة وهل لو قالتله بحبك الصح في نهار رمضان يبقي صيامها ضاع ولا لا

لازم نستفيد بكل لحظة في الشهر دة لانه زي ما قولت بيعدي في لحظة

leonardo dicaprio ليوناردو دي كابريو

طرق جديدة لأصطياد العرسان

دي رسمة كنت رسمتها في تحقيق عملته في الجامعة مع مجموعة من أصحابي
عن البنات اللي بتفتكس طرق جديدة عشان يتجوزوا ويقابلوا فارس الأحلام
اللي هيأخدهم في العربية الجاجور البيضة ويسافر بيهم علي القصر بتاعه اللي في أسبانيا
بتضحكوا والله هو دة فعلا اللي سمعناه لما كنا بنعمل التحقيق يعني لما كنت بسأل
اي بنوتة معانا في الجامعة عن الطرق الجديدة اللي بيصطادوا بيها العرسان
اهو منها الواحد يعرف دماغ الناس دي بتفكر أزاي دلوقتي ومنها الواحد يأخد حذره عشان
ما يتحورش عليه بأي طريقة من الطرق دي وبدل ما أخلص التحقيق هلاقي نفسي نازل علي العبد اللي في وسط البلد
ومظبط الشاب اللي بيبع هناك بجوز جنيهات و بغمزلة بعيني
وبقولة عايز كدة حاجة تمام لأحسن أخوك رايح يدبس تدبيسة صح
المهم نرجع لموضوعنا اتضح ان الأنسات اللي سألناهم
قبل ما بترد عليا لازم تقولي الحوار دة

العبد لله : ممكن تقولي لي اية اخر افتكاسة سمعتيها عشان تصطادوا لغلابة اللي زينا
الأخت الفاضلة تمرقني بنظرة افسرها انا ايه الأشتغاله الجديدة دي يمكن عايز يتعرف عليا وعامل الحوار دة كمدخل طب لما نشوف
اخرته معاه وترد في دلال واضح : واللهي انا مش حاطة الموضوع في دماغي دلوقتي انا عايزة اعيش فترة الجامعة مع نفسي مش أقيد نفسي بواحد يعد عليا اصحابي وواقفة بتضحكي مع دة لية وحوار خنق يعني فأنا ما بفكرش في الموضوع دة دلوقتي اساسا
العبد لله وانا بفكر مع نفسي قولت اية العقل دة كلة ما شاء الله وكنت هسألها بعد كدة سوال مهم قوي وهو
اين نشأت وترعرت سيدتي ؟ اية يا بنتي الدماغ دي اية العقل دة المهم فوقت من الفيلم اللي انا عايشة دة وسألتها
الكلام اللي انتي قولتية دة جميل اوي بس اية هي بقي اخر افتكاسة سمعتيها
الأخت رديت عليا برضة بحواركدة بس مش راضي احكي لتملوا مني وجت الاجابة منها في الاخر
انا واحدة صحبتي ارتبطت عن طريق ال هاي فايف اتعرفوا علي بعض ومشيت الحياة معاهم تمام
العبد لله زهقت من الرغي بتاعها الكتير بس اللي اقدر اقوله ان بعد ما عملنا التحقيق اتضح ان البنات
معظمهم مش كلهم طبعا المادة عندهم اهم شي في العريس اللي متقدم
وازاي هيعيشها في القصر بتاعها والعربية الجاجور بتاعتم هيغيروها كام مرة في السنة

من الأخر انا عندي نصحتين واحدة للشباب وواحدة للبنات

الشباب: احذر في حوارات جديدة ظهرت في الاسواق عشان يصطادونا وانتوا عارفين اننا بقينا نوع نادر الوجود في

الزمن دة انا قصدي طبعا علي الشباب الرجالة مش الشباب التوتي فروتي اللي ملوا البلد اليومين دول ما هم الموسم بتاعهم الصيف يلا هنعمل اية

اما البنات فهو رجاء مني اكتر ما هي نصيحة ياريت تعيشوا علي ارض الواقع بلاش احلام كتير مش لازم اللي هيتجوزك يكون شعر صدرة زي تامر حسني وركبه زي حازم امام او عينة زي احمد عز
والحاجات العقد دي انتب مش بتجمعي كيسة لجهاز
ثانيا مش لازم يكون في غني بيل جيتس يعني عشان تتعطفي علية وتتجوزية المهم الحب اللي بينكوا والاخلاق
وهل فعلا هيقدر يشيل مسؤلية ولا هيطلع توتي فروتي برضة

ياةةةةةةةةةةةة
دا انا طولت عليكوا اوي بس خلاص انا خلصت بس ليا طلب اخير
لو عرفتوا اي افتكاسة جديدة في موضوع الجواز دة ابقوا قولوا لي والثواب والأجر عند الله

هيفاء وهبي

ايوة هي هيفا ... هيفا اللي مجننة الشباب اللي زيك واللي زي

اول ما قالوا عملت حادثة زعلت قوي معقول القطة دي

حصلها كده واتبهدلت بالشكل ده . معقول الجسم اللي مفيش حد ما تفقش علية وقال ان هيفا هي ثورة عمليات التجميل

تمشي علي الارض معقول هنتحرم من المدرعات والمدافع اللي في كل كليب لازم تتجنن البشر بيهم معقول

هتتنازل عن اسلحتها دي وهتحارب قصدي وهتغني بصوتها بس من غير الجسم الجامد ده

والله انا سرحت بدماغي وجت صورة هيفا بعد الحادثة وهي لازم تتنقل المستشفي بسرعة عشان نحاول ننقذ الجنين بسرعة .. اية دة دا فيلم عربي .. سوري يا جماعة انا قصدي ينقلوها المستشفي عشان نزفت كتير بسبب الحادثة

ويأتي الخبر الصاعقة الدكتور يصرح بما داخله

يابنتي يا هيفا لازم نصتأصل ال..... عشان الحادثة اثرت علي الهوا اللي انتي نفخاهم بيه وللأسف عم أحمد العجلاتي قافل النهاردة بمناسبة عيد عشوراء كل سنة وانتي طيبة يا قطة عوضك علي الله

عم احمد دة يا سادة هو الشخص الاساسي في حياة هيفا

اللي من غيرة ما تقدرش تصور اي كليب او تسافر اي حتة غير لما تستشيرة او تستثيرة هي ونيتها الطيبة

وتاتي صرخة مدوية من هيفاء : لالالالالالالالالالالالالالالالالالالا

وافوقك انا من الحلم برضة علي كلمة لالالالالا

الا هيفا انا مش ممكن اتصور حياتي من غير كليبين في اليوم لهيفا دا انا موت يا جدعان

ربنا يخليلنا هيفا وجسم هيفا

وسلام جامد جدا لعم احمد اللي مظبط التظابيط واخد لي بالك انت

ومظبتنا معاه

حرية الصحافة

حرية الصحافة ..حرية الصحافة .. انت ممكن تكون سمعت الكلمة من حد في الشارع او قراتها في اي جرنال

انا هاقولك يعني اية حرية الصحافة .. يعني انك تقدر تكتب من غير مايكون في سقف يحكم شغلك

هتقولي يعني اية سقف انا قصدي ان يكون في حدود لمواضيعك ما تعديهاش فعملنا المعرض عشان نكسر السقف دة

وعبرنا عن الموضوع دة في لوحات كاريكاتير غاية في الروعة والغريب يا اخي ان المعرض بقاله سنة

والموضوع زي ما هو بالظبط ما اتغيرش السقف لسة موجود وهم داخلين يبنوا عليه سقوف تانية وتالتة

.ويمكن يكملوا العمارة كلها

د.حمدي السيد نقيب الأطباء

فيدل كاسترو

شكوكو

أنا بريشة نفسي

عمر الشريف

أحمد حسن لاعب اندرلخت البلجيكي

جديد في جديد

الفاجومي

صورة بمعرض حرية الصحافة بقاعة العرض بمبني الأهرام

الواقفون من اليمين .. العبد لله _ الصباغ _ سعيد بدوي _ عفت _ محمد حاكم _ سعيد أبو العنين

أحمد عبد النعيم

د.محمد حمدي

والجالس علي الأرض مينا جورج

new works

بعض اعمالي الجديدة .... ايه رايك في الجملة دي

واحد يقول عشان رسمله كام رسمه هيتمنظر علينا ...لاوالله ابدا حاشا وماشا

انا بس عايز اعرف اية رايكم في الشغل دة

الأستاذ احمد طوغان شيخ رسامي الكاريكاتير المصريين

الأستاذ أحمد عبد النعيم الراعي الرسمي للمواهب الشبابية بجريدة المسائية

سندباد الكاريكاتير المصري الفنان عفت والفنان السوري رائد خليل

الرئيس الأيراني أحمدي نجاد

زمن الصحوبية ......راح وأنقضي

+انا مش عايز حد يقول اني معقد . اول موضوع أكتبه يبقي عن الصحوبية و خيانة الصحاب والجو ده ... بس عايز أقول ان لسه في الدنيا دي اصحاب بجد اصحاب علي المثل اللي بيقول ( الصديق الصالح اللي بدون مصالح ) عشان ما تتخنقوش من المقدمة هدخل في الموضوع علي طول ....
فاكرين في فيلم قديم اسمة العظماء السبعة انا يا جماعة قابل 3 هما فعلا من العظماء دول
والأربعة الباقيين لسة تحت قيد البحث بلغت عنهم و هيتمسكوا بأمر الله

الأول .....
أحمد سيد صلاح لو اقدر أقول انه بالنسبة ليا أكتر من أخ و عارفيين انتوا الجو ده ومقدرش استغني عنة بس دة بجد مش كلام بلوجرزات
ده حقيقي الشاب دة بالنسبة ليا كل شى بنروح الجامعة مع بعض بننزل الشغل مع بعض كل حاجة مع بعض مع بعض ( ملحوظة انا قصدي بكل حاجة مع بعض مع بعض اننا ما بنفترقش ابدا وشنا في وش بعض طول الوقت وبلاش الضماير السيئة تفسر كلامي غلط ) نادر لما تلاقي صاحب ممكن يضحي بأي حاجة عشلان يشوف صاحبة مبسوط لو لقيتوا حد بالشكل دة بلغوا عنه قصدي امسكوا فية بأديكوا وسنانكوا (أحمد) الشاب الخطر اللي لابس تي شيرت وانا ماضى جنبة بالبنط العريض

الثاني .....

سيادة اللواء أركان حرب ياسر حماية على فكرة انا بقولة قائمة الالقاب دي كل مابشوفة
. عارف لما تدخل مكان غريب مش عارف فيه حد وتلاقى واحد ظهر وبيسلم عليك بحرارة قوي كأنة يعرفك من زمان هو دة بالظبط اللي انا حسيه لما شوفت الاستاذ حماية انا واحمد لما رحنا نشتغل فى جريدة وشوشة ....

الراجل دة فية مميزات كتير اقولكوا منها حبة . من اجدع الناس اللى ممكن تقابلهم في حياتك
من اكتر الناس تواضع مع انه بيشتغل فى اكتر من مكان اللهم لا حسد انا مش بقر انا بحسد بس . بجد انا بحب الرا جل دة جدا ومن اكتر الناس اللي ممكن يقف جنبك ويساعدك عشان تحقق حلمك (ياسر حماية ) اللي بيشرب سيجارة ورافع حاجب وبيبص بثقة .. صحفي بقي تقدر تقول حاجة

الثالث .....
سيادة رئيس تحرير جريدة وشوشة الأستاذ محمد فاروق الراجل دة واصل واصل واصل يا جماعة بس علي كل دة انسان لابعد الحدود اول ما قبلته اهديتة البوترية اللي انتوا شايفينة قدامكوا دة ( محمد فاروق اللي لابس نضارة سودة ) شفته ايوة هو دة . المهم بصيت بحذر وهو بيتفرج علي البورترية لقيتة بص ومرة واحدة لقيتة بيتلفت حوالية انا قلت هيمسك أي حاجة قدامه وهايباصيني بيها في وشى وهايقولي اخرج برة بيتي يا ..... بس لقيتة بيضحك بيقولى شغلك حلو حابب تكون معانا هنا في الجرنال قلتله طبعا . ومن يومها وهو بيتعامل معايا كاني اخوة الصغير الراجل ده منظم جدا انا افتكرتة بيحسب كل حاجة بالورقة والقلم لقيت دة طبعة اساسا كدة . ربنا يكرمنا ونبقي زيه

النهاية ....
الصحوبية دي مفيش اجمل منها ولو لقيتوا يا جماعة صاحب بجد امسكوا فيه بأيدكوا وسنانكوا وعيش وسيبني اعيش