Monday, September 24, 2007

تاج أبو صلاح


طبعا انتوا شايفين التدبيسة الاصلي اللي دبسني فيها ابو صلاح بس هاعمل اية هجاوب وامري لله


لوقالو لك أختار عصر من عصور مصر علشان تعيش فيه تختار اي عصر وفي اي عهد واي حاكم واشمعني ؟

ا
نا اختار اعيش في عصر المماليك والدولة العثمانية والجو دة وبالذات في عهد محمد علي باشا شخصيا واقولك لية محمد علي بالذات اصلي بحب دماغ الراجل دة ازاي الراجل دة من لاشي و جندي في الجيش الالباني يمسك حكم مصر ويعمل فيها كل النهضة دي ملحوظة اللي مستغرب كلامي يراجع الفصل التاسع في كتاب التاريخ بتاع ادبي في ثانوية عامة الراجل دة عمل نهضة علمية وثقافية واول واحد يعمل مطابع في مصر شغلانة يعني وكان نفسي اكون موجود ساعة الاغتيال اللي عمله للمماليك و احذرهم ان الراجل دة يهودي ومدبر لكوا مقلب وهيموتكوا بس ما كنش حد منهم هيسمع كلامي يلا مش مشكلة ..

اول اولوية في حياتك عيلتك ولا شغلك ولا اصحابك ؟

بصراحة عيلتي هي اهم اولوية ليا واول اولوية في حياتي وبعد كدة الصحاب وفي الاخر الشغل


اية اكتر حاجة بتحبها في رمضان ؟

اكتر حاجة بحبه في رمضان الجو اللي بيبقي بعد الفطار تلاقي الناس كلها طيبة وتبص في وشهم تحس بأرتياح غريب والصلاة في الجامع وقراءة القران بالليل اول ما بحس اني مخنوق او في موضوع تاية فيه ومش عارف اقف علي ارض صلبة بحب اتوضي واصلي واقعد ادعي واقرا قران وجو اللمه اللي بيبقي بعد الفطار والعزومات ولمة العيلة وقعدة القهوة مع الاصحاب بالليل لو اقعد احكي مش هاخلص خليني اجاوب علي السؤال اللي بعدة

أوصف ليا أجمل فطار ممكن تفطرة ؟

أحلي فطار ممكن افطرة ... اقولك اولا طبق الخشاف الجامد او البلح باللبن ادخل بقي علي الفطار مكرونة بالباشميل وطبق الطرشي الجامد اللي مليان فلفل حراق مليان شطة وجنبها طبق كفتة كدة وحبة تحابيش واللهي جوعتني اللهم اني صايم المهم ندخل في الحلو القطايف المحشية مكسرات اللي عايمة في السكر او طبق زلابية او لقمة القاضي غرقانة في العسل لا ياعم كفاية كدة هافطر وها تبقي انت السبب

لو انت حاكم مجموعة من الأفراد هتكون عادل ؟ طب هتعمل اية عشان تتأكد انك حاكم عادل ؟

والله مش عارف بس ممكن اقولك اني بطبع شخصيتي اني مش ديكتاتور يعني هكون عادل في الحكم عليهم
اما ازاي اقدر اعرف اني عادل اقولك انا فعلا لو عادل هتلاقي الناس دي بتتعامل معايا بأرتياح وانا عارف انك ممكن تقول ممكن يعاملوك كدة خوف منك او احترام بس اقولك مش شكر في نفسي بس انا بقدر افهم اللي قدامي كويس واقدر اعرف انه بيعمل علي فيلم وبكدب ولا بيتكلم بصدق


اللي يبوظ الحكام . نفسهم ولا الشعب ولا الحاشية المقربة ؟

التلاته مع بعض

مين أكتر أعلامي مصري بتحبة ؟

عماد الدين أديب

قريت ديوان عمر مصطفي بتاع بلوج تجربة ( اسباب وجية للفرح ) عن دار ملامح ولا لسة ولو اة اية رأيك فيه؟

لا ماقريتهوش

لو ممكن تشتغل شغلانة تانية غير اللي أنت بتشتغلها أو كنت بتشتغلها كنت تتمني تبقي أيه ؟

كنت هتمني برضة أشتغل رسام كاريكاتير وصحفي لأني اساسا منفعش في اي شغلانة الا دول

اية تاني بلد تتمني تعيش فيها بعد مصر ؟

أسبانيا او باريس ودة لاني بحبهم اقوي اسبانيا احلي بلد ممكن تشوفها معالم سياحية وتراث حاجة وهم كدة باريس بقي يعني مدينة النور متحف اللوفر بلد الفنون الجميلة كلها بجد نفسي اسافر اسبانيا او باريس

أوصف ليا ترتيبات أجمل فرح ممكن تحضرة ؟

انا مبحبش الافراح التقليدية بحب الافكار الجديدة يعني انا قريت قريب في جرنال اسمه الجمعة ان في واحد عمل فرحة كله علي البسين واخر الفرح راح ناطط هو والعروسة في المية والمعازيم وراهم والحياة كلها كانت بلل في بلل ممكن تقول اية المجنون دة بس انا قولتلك ما بحبش الافكار التقليدي

بتراعي كلام الناس والقيل والقال . ولا لا وقول اه ولا لا لية ؟

لا لا لا ودة لان كلام الناس لا بيقدم ولا بيأخر يعني الناس كلها لما تمسك موضوع وتقعد ترغي فيه وبعد فترة يدوروا علي موضوع تاني يرغوا فيه وهكذا ... عرفت لية انه لابيقدم ولابيأخر

صحيت من النوم مالقتيش الموبايل ولا الكمبيوتر وال الكاميرا الديجيتال و لقيتنا رجعنا لعصر الحمام الزاجل هتكون سعيد ؟

دة لو حصل كدة ممكن أموت ماينفعش أكون من غير الموبايل واقعد ارن واتكلم وابعت مسدجات والكمبيوتر مش ممكن اعيش من غيرة ولا من غير النت والافلام الاجنبي والاغاني وشاكيرا و فيروز والفوتو شوب والكاميرا الديجيتال مقدرش اعيش من غيرها دة شغلي كلة بخلصه بيها لا يا عم مقدرش اعيش من غيرهم

السعادة هي ؟

راحة البال وان تكون من جواك حاسس بنفسك قوي وسعيد بنجاحك والاول طبعا قبل كل دة رضا الله عليك

لما تحب تهرب من كل شي بتروح فين ؟

بحب اتمشي في وسط البلد وبعد كدة اطلع علي كوبري قص النيل وقعد افضل ماشي من التحرير لحد ما اوصل
للجيزة


أمتي أول مرة خدت فيها نفس طويل كدة وقلت بينك وبين نفسك يااااه الظاهر أنا فعلا كبرت ؟

اول ما تميت ال 20 سنة وحسيت ان دي أخر سنة ليا في الجامعة وبعدها هاتخرج وابدا ادور علي شغل واتحمل مسؤلية نفسي

لما بتعمل عمل خيري بيكون ايه هو دافعك الاول ؟

بيكون دافعي الاول اني بحب الناس كلها ومدام في استطاعتي اقدم الخير دة فلية لا

بتشرب سجاير . ولو الاجابة أة . اية شعورك لو شفت ست بتشرب سجاير . ولية ؟

كنت بشرب سجاير والحمد لله ربنا انعم عليا وبطلت وبصراحة لوشفت ست بتشرب سجاير هستحقرها جدا
بتعرف أيدك اليمين من الشمال أزاي ؟

اه والله دي مشكلة فعلا بس ممكن اقولك اني علطول بلبس الساعة في ايدي الشمال فلو غلط مرة ولبستها في ايدي
اليمين هتلخبط ومش هعرف ايدي اليمين من الشمال

أية اكتر موسيقي بتحبها . واية اكتر اله موسيقية بتحبها ؟

أكتر موسيقي بحبها موسيقة الرحبانية او الاخوان رحباني وطبعا دة بصوت جارة القمر الجميلة فيروز اما الموسيقة الاجنبي فا انا بحب الموسيقة الاتيني والاسباني والبوب اوي اوي . اما اكتر اله موسيقية بحبها
هي الجيتار الاسباني بعشقة جدا


في رأيك لية الذوق والنخوة أتعدموا ؟

هما موجودين لغاية دلوقتي بس أحنا اللي اتغيرنا وبقينا وحشين أوي في بعض وبقينا ماديين وكله بيجري ورا الفلوس عشان كدة أتعدموا

أية الحاجة اللي لو حصلت لك تبقي سعيد قوي ؟

ابقي سعيد قوي لو حققت احلامي اللي طول عمري بحلم بيها واني اقدر اتحدي نفي واكون الانسان اللي انا رسمة في مخيلتي من زمان

تختار يبقي عندك أرض زراعية ولا احدث عربيات ولا كام عمارة ولا فلوس في البنك ؟

لا انا اختار يكون عندي ارض زراعية لاني بيها ممكن اجيب العربية وابني عمارة ويبقي ليا رصيد في البنك

البحر ولا النيل ؟

النيل طبعا

مركب ولا طيارة ؟

الطيارة

مجنون ولا عاقل ؟

مجنون جدا جدا جدا

تقرأكتاب ولا تتفرج علي فيلم ؟

أتفرج علي فيلم بس يبقي أحلي وأحلي لو أقرا رواية واتحولت بعد كدة لفيلم زي عمارة يعقوبيان ونادي القتال

بتممر التاج لمين ؟

امرره لمين .... امرره ل د . اشرف حمدي و الفنان ياسر حسين وياسمين حميد و سمسم
وحبة حاجات البلوجر بتاع إيمان


Sunday, September 16, 2007

هالة سرحان الجزء الثاني



عودة هالة ......لا دة مش فيلم رعب ولا حاجة بس ممكن تقول ان دة تكملة فيلم عربي اتعمل علينا
وللاسف كلنا صدقناه ....ها افتكرت ان كنت ناسي افكرك
انتظروا اجرأ حوار علي الشاشات العربية حوار فتيات الليل الدنيا قامت وقعدت وازاي
البنات دي تتكلم بالطريقة دي وطلع كل دة كان فيلم وانتوا طبعا عارفين الباقي
سفر حالة سرحان للندن للعلاج وصور في الجرايد والمجلات
ليها وهي علي سرير المرض عشان نصدق وبرضة طلع في الأخر فيلم
روتانا تتخلي عن حالة سرحان في محنتها الأخيرة ومانشيتات
تأكد الخبر وتفأجا انها ي رمضان دة بتظهر في برنامج يومي علي روتانا موسيقي والله اعلم سمعت برضة انها بتعمب برنامج علي
قناة ال ال بي سي الفضائية اللبنانية
عرفت لية بقولك ان كل الموضوع دة فيلم وانت بتتفرج علية بدون ماتحس

Friday, September 14, 2007

لحظات رمضان

اولا كل رمضان وانتوا بخير ...... انا اخترت عنوان لحظات رمضان عشان حاجة مهمة قوي
وهي ان الشهر الكريم دة بيعدي في لحظات يبدأ وبعد كدة تلاقي اول عشر ايام في الشهر خلصوا هوب جه نص الشهر هوب لاقيت نفسك في العشرة الاواخر وبتختم القرأن عشان كدة بقولك بيعدي في لحظات
عشان كدة انا سجلت لحظتين في رمضان يارب يعجبوكوا
اللحظة الاولي : بنت بتستعد لشهر رمضان بتكتب جدول يومي ليها هتقرا كام جزء في اليوم
هتصلي قيام الليل والتراويح بمعني اصح واخده الموضوع جد وناوية
تستفيد بالشهر الكريم دة بكل طاقتها

اللحظة التانية : بنوتة اهم حاجة عندها هتقضيها ازاي في رمضان اية المسلسلات

الجديدة اللي هتتعرض

وقصة كل مسلسل اية بالضبط واية حكم الدين في ان البنت ممكن تكلم المز بتاعها او خطيبها في نهار رمضان وهل يجوز ولا لا وهل ممكن تكلمة بالليل ولو طول تستأذنة وتقولة اصلي هاصلي قيام الليل جماعة هنا مع العيلة متعطلنيش اكتر من كدة وهل لو قالتله بحبك الصح في نهار رمضان يبقي صيامها ضاع ولا لا

لازم نستفيد بكل لحظة في الشهر دة لانه زي ما قولت بيعدي في لحظة

Wednesday, September 5, 2007

طرق جديدة لأصطياد العرسان


دي رسمة كنت رسمتها في تحقيق عملته في الجامعة مع مجموعة من أصحابي
عن البنات اللي بتفتكس طرق جديدة عشان يتجوزوا ويقابلوا فارس الأحلام
اللي هيأخدهم في العربية الجاجور البيضة ويسافر بيهم علي القصر بتاعه اللي في أسبانيا
بتضحكوا والله هو دة فعلا اللي سمعناه لما كنا بنعمل التحقيق يعني لما كنت بسأل
اي بنوتة معانا في الجامعة عن الطرق الجديدة اللي بيصطادوا بيها العرسان
اهو منها الواحد يعرف دماغ الناس دي بتفكر أزاي دلوقتي ومنها الواحد يأخد حذره عشان
ما يتحورش عليه بأي طريقة من الطرق دي وبدل ما أخلص التحقيق هلاقي نفسي نازل علي العبد اللي في وسط البلد
ومظبط الشاب اللي بيبع هناك بجوز جنيهات و بغمزلة بعيني
وبقولة عايز كدة حاجة تمام لأحسن أخوك رايح يدبس تدبيسة صح
المهم نرجع لموضوعنا اتضح ان الأنسات اللي سألناهم
قبل ما بترد عليا لازم تقولي الحوار دة

العبد لله : ممكن تقولي لي اية اخر افتكاسة سمعتيها عشان تصطادوا لغلابة اللي زينا
الأخت الفاضلة تمرقني بنظرة افسرها انا ايه الأشتغاله الجديدة دي يمكن عايز يتعرف عليا وعامل الحوار دة كمدخل طب لما نشوف
اخرته معاه وترد في دلال واضح : واللهي انا مش حاطة الموضوع في دماغي دلوقتي انا عايزة اعيش فترة الجامعة مع نفسي مش أقيد نفسي بواحد يعد عليا اصحابي وواقفة بتضحكي مع دة لية وحوار خنق يعني فأنا ما بفكرش في الموضوع دة دلوقتي اساسا
العبد لله وانا بفكر مع نفسي قولت اية العقل دة كلة ما شاء الله وكنت هسألها بعد كدة سوال مهم قوي وهو
اين نشأت وترعرت سيدتي ؟ اية يا بنتي الدماغ دي اية العقل دة المهم فوقت من الفيلم اللي انا عايشة دة وسألتها
الكلام اللي انتي قولتية دة جميل اوي بس اية هي بقي اخر افتكاسة سمعتيها
الأخت رديت عليا برضة بحواركدة بس مش راضي احكي لتملوا مني وجت الاجابة منها في الاخر
انا واحدة صحبتي ارتبطت عن طريق ال هاي فايف اتعرفوا علي بعض ومشيت الحياة معاهم تمام
العبد لله زهقت من الرغي بتاعها الكتير بس اللي اقدر اقوله ان بعد ما عملنا التحقيق اتضح ان البنات
معظمهم مش كلهم طبعا المادة عندهم اهم شي في العريس اللي متقدم
وازاي هيعيشها في القصر بتاعها والعربية الجاجور بتاعتم هيغيروها كام مرة في السنة

من الأخر انا عندي نصحتين واحدة للشباب وواحدة للبنات

الشباب: احذر في حوارات جديدة ظهرت في الاسواق عشان يصطادونا وانتوا عارفين اننا بقينا نوع نادر الوجود في
الزمن دة انا قصدي طبعا علي الشباب الرجالة مش الشباب التوتي فروتي اللي ملوا البلد اليومين دول ما هم الموسم بتاعهم الصيف يلا هنعمل اية

اما البنات فهو رجاء مني اكتر ما هي نصيحة ياريت تعيشوا علي ارض الواقع بلاش احلام كتير مش لازم اللي هيتجوزك يكون شعر صدرة زي تامر حسني وركبه زي حازم امام او عينة زي احمد عز
والحاجات العقد دي انتب مش بتجمعي كيسة لجهاز
ثانيا مش لازم يكون في غني بيل جيتس يعني عشان تتعطفي علية وتتجوزية المهم الحب اللي بينكوا والاخلاق
وهل فعلا هيقدر يشيل مسؤلية ولا هيطلع توتي فروتي برضة
ياةةةةةةةةةةةة
دا انا طولت عليكوا اوي بس خلاص انا خلصت بس ليا طلب اخير
لو عرفتوا اي افتكاسة جديدة في موضوع الجواز دة ابقوا قولوا لي والثواب والأجر عند الله